تصريحات اللاّعبين التوانسة بعد الماتش

بعد كلّ ماتش يجيك ملاعبي يقطر بالعرق باش يظهر في التلفزة و يجاوب على الأسئلة الغبيّة اللّي يتحفنا بيها آل الصحافة، و كان ما حاولش يتقوّى على بدنو و يفرنسي علينا (الأمثلة عديدة من ماهر عامر، لزهيّر الذوادي...) تكون ال إجابات عشرة أنواع

1. "و اللـه..." (لازم منها قبل كل إجابة ماكانش يقولوا يكذب) "كنّا معناها، مركزين معناها، و كل شيء" (معناها و كل شيء زادة إجباريّة !)

2. "المهم النقاط الثلاثة" لازمة بعد كل إنتصار حتّى لو كان ماتش كوپ 

3. "طبقنا تعليمات المدرّب و كنّا واقفين مليح على سقّينا" ثمّة شكون ماطبّقش تعليمات المدرّب و جرّب ياقف على يديه ؟

4. "خادمينها في الأنترانمون" في العادة نسمعوها كي يحكي لاعب على هدف موش بلعاني، أمّا الذوّادي قالها مرّة كيف معين الشعباني مركا ضد مرماه! نو كمنت

5. "ناخذوا الماتشوات، بالواحد بالواحد و كل ماتش مباراة كأس" كيف حاولنا ناخذوا الماتشوات بالزوز ولاّ بالثلاثة، طلعت موش حكاية

6. "الماتش يدوم 90 دقيقة" معلومة مهمّة و برشة عباد ماتعرفهاش

7. "مباراة من فئة 6 نقاط" اللاّعب ينجّم يبدّل القانون كي يبدا يلعب على السقوط، تنجموا تسألوا مختار

8. "الله غالب، هاكي الكورة، عاكسة اليوم" اللاّعب التونسي كي يربح يربح عن جدارة و كي يخسر قضاء و قدر

9. "الحكم ظلمنا، نحّالنا ثلاثة پيلانتيات و زوز كورنارات و سبلي أمّي" ثمّة حتّى شكون قال لاربيتر ريحتو بالشراب (دون ذكر الأسماء)

10. "اللي فيه الخير ربّي يسهّل فيه" و الخير اللّي يحكي عليه اللاّعب، دزّة فلوس باهية من الخليج وإلاّ من ليبيا