الحلول النظريّة لمعادلة المرزوقي الكلسيطوحذائيّة

منذ معادلة شرودينغر عام 1935 و تجربة القطّ اللّي لاهو حيّ لاهو ميت، ماشفناش لغز حيّر الإنسانيّة بالدرجة هاذيكة، حتّى لين صارت ثورة في تونس، و إنتخابات جابتلنا رئيس مؤقّت يعمل الكيف، طلعلنا بمعادلة الصبّاط و الشلاكة لحلّ مشاكل التنمية الجهويّة. هاو باش نخلّي الدكتور يطرح عليكم المعادلة. (و ركّزوا مع السيّد اللّي بجنبو و نظرات الإستغاثة)

قدّام أهميّة المسألة، طرحنا السؤال على أكبر المفكرين ، و ننقل لكم بكلّ أمانة الحلول الّتي قدّموها. (موش بالرّسمي راهو نفدلكو يمشيوش يشكيوا بيّا؟)

صورة للتجمّعي التيجاني كلسيطة

1. الصادق شورو: يقصّلهم ساقيهم خاطر طالبوا بصبّاط و كلاسط.
2. حمّة الهمّامي: يلبّسهم فردة بفردة و يهزّهم يعملوا إعتصام.
3. الطّاهر هميلة: يشريلهم مريول.
4. سمير ديلو: ينفي أن يكون هناك واحد من الأولاد حفيان.
5. رفيق عبد السلام: يلبّسهم شلاكة، وآشبيها الشلاكة؟
6. سهام بادي: تشري كلاسط للّي عندو صبّاط، والحفيان كان موش عاجبو يشرب ماء البحر.
7. الباجي قايد السبسي: ماعندوش صغار، و اللّي يلقى غشّير يجيبهولو.
8. دجو البيدوبير: صغار؟ فين فين؟ 
9. مصطفى بن جعفر: يشري صبّاط و يعطيه لولد الجيران.
10. وجدي غنيم: يخلّيهم يمووووووووووووتوا  بغيضهم.
11. خالد القربي: الصبّاط ريحتو بالشراب.
12. آدمين فايسبوك: هل تعلم فوائد المشي حافي القدمين؟ أنشرها و لك الأجر.
13. الهاشمي الحامدي: عجبتّو حكاية الصبّاط و الشلاكة و تنرفز كيفاش المرزوقي فكّر فيها قبلو. حتّى هو مازال موش عارف كيفاش باش يعمل.
14. اليساريين: شراوا صبّاط، الزوز فرادي يسار.
15. جلال بريك: يكفر عليهم الزوز و يمشي يعمل سكرة بحقّ الصبّاط.
16. حمّادي الجبالي: هاو عمّي ماكاين جابلهم زوز سبيدريات "نايك" من أمريكيا.
17. جوهر بن مبارك: ياكلهم بالكلام و يشري حكّة جال لشعرو.
18. المنصف المرزوقي: طلع يكذب ما عندوش ولاد بالكلّ.
19. البي دي بي: يحتجّوا،  إيّاد الدّهماني يعيّط على الصّغار، و يغادروا المنزل.
20. الشعب التونسي: يقعدوا يتعاركوا على الهويّة و ينساوا الأولاد.